Búverk í horfnum heimi er eins konar framhald bókarinnar Búverk og breyttir tímar sem út kom árið 2024. Bókin fjallar um verkfæri og verkhætti sem algengir voru fyrr á árum og fleira er tengist tæknivæðingu bústarfa og landbúnaðar. Flest af því er nú horfið eða hefur þróast að kröfum tímans.

Höfundurinn, Bjarni Guðmundsson, er frá Kirkjubóli í Dýrafirði þar sem hann ólst upp við almenn sveitastörf. Að búnaðarnámi loknu, bæði hérlendis og erlendis, stundaði hann kennslu og rannsóknir við Hvanneyrarskóla um áratuga skeið. Bjarni veitti uppbyggingu Landbúnaðarsafns Íslands forstöðu um árabil.

Bjarni hefur skrifað margar bækur um búnaðarsöguleg efni og haldið fjölda fyrirlestra um þau. Bækur hans hafa notið mikilla vinsælda enda fjallar hann í þeim um efni sem hann gjörþekkir. Hann miðlar því til lesenda í máli og myndum af hlýju og virðingu á aðgengilegan hátt.